(ال شاعر ال ) ….شعر عامية بقلم أحمد التبيني
(ال شاعر ال ) ….شعر عامية بقلم أحمد التبيني
ال شاعر ال
طب قول لى اماره
وبقيت تتنادى ب ياشاعر
ماتقول لى ازاى؟!
عمال بتحب ف سلامتها وينوبك باى!
ولا يوم حسيت بلى إتأذى
ولا طفيت نار
وبقيت بسكوتك بتنقط على نارهم جاز
طب يخرب بيت ايها شاعر
لو كان منحاز
ولا يشعر بوجيعة غيره
وله قلب فلاذ
ال شاعر ال!
طب عينك ماشافتش ف سوريا
كم طفل جعان؟
كم عيله إتشرد اولادها؟
كم اب إتهان؟
كم مسلم للمسلم جاحد
وعليه سجان ؟
وسيادتك قاعد بتغازل
حُسن النسوان..ال شاعر ال !
طب فين ماتقول لى بقى رسالتك
والوطن العربى بيتفكك
وبقيت من خوفك تتشكك
إنك انسان!
دا الشاعر عمره ماكان واطى
ولا قلمه جبان..
عيش حبه ياشاعر ف الواقع
وبلاش توهان
علشان احساسك م الاخر
أطهر احساس
انت اللى توصل للدنيا
اوجاع الناس
وانت اللى رصاص قلمك يوجع
وانت اللى تخلى اللى اتفرق
يتلملم من تانى ويرجع
مانتش انسان عادى بتسمع
فاتردد كل اللى سمعته
من غير اوزان
دى الكلمه بتوزنها بحكمه
وحروفك احجار متشاله ف ايدين اطفال
بتحب فلسطين متصانه..والقدس امان
دالشاعر لو نرسم صورته
اغلى من كل اللى رسمهم
روفايللو..وليونارددافنشى
فاياشاعر فتح ماتنامشى
وان كنت حترقص مع فيفى
على دم الشهدا المتبعتر
فى حارات الناس المطحونه
خد بعضك من قلب الساحه
خد بعضك وامشى..ال شاعر ال
طب يخرب بيت ايها شاعر
لو كان منحاز
ولا يشعر بوجيعة غيره
وله قلب فولاذ
::::::::::::::::::::::::
