وبالصدفة …. شعر عامي بقلم أحمد رأفت
وبالصدفة …. شعر عامي بقلم أحمد رأفت
وبالصدفة
قابلت عيونك المعجونة بالطيبة
وملح الأرض
وكان طعم اللقا مجنون
وكان ساحر
صبغ عمري اللي تاه مني
بمليون وعد
وكنت في عتمتي مسجون
قاعد في الركن متشظي
وبعضي كان مخاصم بعض
صالحتيني بنظرة عين
على الأيام
وسلفتيني من قلبك
شوية نبض
ومن تاني
رجعت اسمع دبيب قلبي
اللي شبعان موت
رجعت أسمع
حفيف نسمة بتتمحك
في شجرة توت
بتغزل فيها غنواية
حروفها
من دهب وياقوت
رجعت أشوف
وحبيت نفسي في مرايتك
وحضنك
كان غيطان وبيوت
عرفت معاك معنى النور
لما يزور
كسيح مربوط في ساقية عمر
مش بتدور
زحف على حد موس عريان
عشان يقطع حبال لفت على رقبته.. بقالها دهور
لقاك بتستري جوعه ..
بكسرة حلم ..
وحبة شعر متفرط
بينزف من إناء مكسور
طلعله جناح
وصار جوة الفانوس مارد
بلمسة من ايديك يثور
ونظرة من عينيك يحن
ويسكن
قلبك المسحور
