يمكن تلقالك ضحكه…….عامية بقلم اشرف الشناويشاعر عاميه البرامون – المنصوره
يمكن تلقالك ضحكه…….عامية بقلم اشرف الشناوي
شاعر عاميه البرامون – المنصوره
لو لسه في قلبك
حته براح غني
وافرد في جناحك
لف الملكوت
واضحك بالضحكه
هتطلع من وجعك وتفوت
واتشعبط في الصبح وعدي
القلب اللي مافهش اماني بيصدي
واقفل على خوفك مية باب
مش كل اللي بيضحكلك احباب
قوم واصلب طولك
كسر في حيطان الوجع المرسوم
واعمل من حلمك مركب
في البحر تعوم
واغسل وشك لو كفك
فيه حبة نور
الأرض اللي بتعطش
راح تفضل بور
ايه يعني جناحك مكسور
قوم غني وكمل مشوارك
وافتح للشمس تدفي الجدران
قلبك لو ساب الضي يعدي غلطان
غربل في جراحك
دور جواك عالانسان
يمكن تلقالك ضحكه
وسط الاحزان
………………
