ماتنزعجوش ….شعر / محمد الساعي
ماتنزعجوش ….شعر / محمد الساعي
أنا مضطر أزعجكم بكام كلمه ..
فأرجوكم ماتتضايقوش
بكام نبضه .. في قلب بينزف الأحلام
ومتخرّم ب 100 خرطوش
بكام قصه .. بتغزل كل حكاويها
ومعانيها بخيط مغشوش
بكام شطره في بيت مكسور
وكام حرف اتلوى غصبًا، وعاش في الدور
وكام زرعه .. رميتها ف أرض عطشانه ..
وطلعت بور
ووش باشوفه في مرايتي ..
وماعرفتوش
ماتنزعجوش
سنين العمر قضيتها باحارب خصم ما قابلتوش
ف متحاولوش …
تكونوا القاضي والجلاد
مانا قضيتها طول عمري .. بعاد في بعاد
وحملي زاد
ف سلِّمت لبواقي الذكرى أنَّاتي
وغمضت العيون عمداً
عشان ما المحش زلاَّتي
وكالآتي …
باصارع كل يوم نفسي .. ف تهزمني
وبانزع يومي من أمسي ..
ف يحرمني الشعور بالذات
ومش فاهم ..
وليه مخاصمنى انا بالذات
عشان فكره ومحبوسه بتتشوق نسيم بكره ؟؟
عشان متكتفه الخطوه ..
ومسجونه في 100 ذكرى ؟؟
عشان مش قابل التسليم لدقات الحروف ع الباب ؟
عشان اسباب ماهش كافيه
حروف حافيه بتنسج م الألم .. موال
وباقي القصه معروفه .. هاعيش رحَّال
أفض بكارة الفكره فتولد للحياه متاعيس
بتتعايق .. وترسم ضحكه مغشوشه ..
فتخدع كل يوم إبليس
وبالترابيس ..
بتسجن خيط شعاع طالع لبكره الجاي
انا واللهِ مش نسَّاي
وفاكر كل تفصيله ف كتاب الحزن
وضمة حضن كات ذكرى .. ومشتاقها
وكدبه خلقتها بإيدي
وانا مضطر – طول عمري- اصدقها
عشان أقبل بإني أعيش
يادوووووب .. درويش
وتايه غصب في الحَلَقَه وباتطوَّح
يمين مره … شمال مراااااااااات
ولو يوم قالوا على شاعر فارقنا ومات …
ماتتخضوش
أنا آسف
وأرجوكم ….. ماتنزعجوش
