كفايه يادنيا ….شعر عامية بقلم السيد الشيتى
كفايه يادنيا ….شعر عامية بقلم السيد الشيتى
الدنيا أصعب معادلة
تُهنا ف تفسيرها
تاهت عقول البشر
والحقد غيرها
فى ناس عايشه
بتتفرج على غيرها
وناس تِشقا وناس
عايشه على خيرها
وناس عايشه عشان تفرح لفرح الناس
وناس تتمنى لوتسقيك
بمُر الكاس
وناس العز صاحبها
وناس الحزن ف عنيها
وناس بتضحى بصحابها
وناس خيرها
مهوش ليها
فى نوع م الناس مقابلتهم ترد الروح
كلامهم يشبه البلسم
يداوى جروح
وناس لو يوم تقابلهم
تقول ياريت مايتكرر
حياتك تبقى يوم حلوه
تشوفهم طعمها يمرر
نفاق الدنيا ف عنيهم
كلامهم احلى م السكر
تعيش الحب وياهم
تحس ف ضهرك الخنجر
فى ناس حاسه باحساسنا
وناس بتعد انفاسنا
وناس عايزه ترخصنا
وناس تتمنى تخرصنا
وناس بتحب تخدمنا
وناس تتمنى تتدفنا
وناس عايزه تعلينا
وناس تقتل امانينا
وناس مستخسرين فينا
نكون عايشين
وشاغلين نفسهم بينا
بحقد دفين
فى ناس تحلف بقيمة العمر وياهم
وناس تتمنى لو ترحل وتنساهم
ودنيا عمرها فانيه
ولمّا الناس حواليها
وسوقها عمره مش دايم
هيرحل كل من فيها
