(في الممنوع) …شعر عامية بقلم محمد البياع
(في الممنوع) …شعر عامية بقلم محمد البياع
كان حِلمي أشوفها
ف حِلم يوَشْوِش وِدني رِيحان
كان حِلمي تْبان لي
كَأن الجَنة مَاليها بْيبان
وفَتحت الشْيش الصُبح
لَقيت الصُبح جعان
فَطرته بنص الحلم
ونُص الحِلم ف تغريد العصافير
ولقيتها الصبح بتكتبلي
على كَف إديها حَاجات
تَرجمت السَطر الأول لَهفة وشوق
أتاريه عنوان
لقصيدة السطر الاول فيها ديوان
أيا هذا العاشق والمعشوق
أيا عِشق الروح
فَسرلي كَيف يهزُ هواكَ جذورَالشَوق
فَسرلي كَيف بُساط الريحِ يطير
فَسرلي أضغاثَ الأحلام
كَيف تُراودني التأويل
وف لحظة شوقها ولهفة إيدها
لقيت العَرق النازل منها
بيل الورقة بحب سنين
كان كُلي يقين إن المصباح مرتاح
من يوم مالاقها قادتلي عنيها صباح
أنا شوفت الحب الصح
ف زمن الحب البور
أنا شوفت الحب موقف نفسه طابور
ولَمحت ف عين الناس حُب اللذات
بس أنا بالذات مغرور
عاشقاني حُورية بنُص بَنات الحور
صفصاف الشجرة ف إيدها ريحان
وصوابع إيدها بتعمل أزمة لأي مرور
كات مرة بتتسوق ف السوق
بتدور على حَبة تُفاح
كُل الثمر اللي بيتباع مَغشوش
فاجاة البياع
أيوة البياع
قالها هاوزنلك طَرح الجنة
ف كف الإيد
ف قالتله إزاي
طب هاتي خدودك تملى الكَفة ثمار
هاوزنلك منها الكيلوابنص الدنيا
ونص الدنيا التاني بلاش
علشان أعملك م الكَفة التانية قُماش
يكسي البردان
ويصُب القوت ف بطون الناس
ضحكت ضحكة فهزت كل عروق العشش البوص
وأنا جاي مش عارف إيه سَبب الزلزال
أتاريها بتمشي وتتمخطر بالخلخال
بَصيت ف وشوش الناس
مالقيتش وشوش
تَسبيل تَسبيل
وكأن مُنوم زار الناس في رموش الليل
طب يالله ياست بنات الحور
بكفاية هزار
غَطيتها بعين والعين التانية
بترمح بالمشوار
رَوحنا البيت
فَلقيت الباب مقفول
والنور كان مالي الدنيا ومالي البيت
قطعوه
إتخضت
وإتهزت
حَضنتي الحُضن الشَاهد ع التَوهان
وأنا كالمبلول سَرحان
ودَعيت النُور مايجيش
على فكرة النور لساها مقطوع
وأنا لسه حاضنها
ووافق في الممنوع
