( عنادية ) …بقلم الشاعرة زينب سليم أحمد
( عنادية ) …بقلم الشاعرة زينب سليم أحمد
قال ايه مخاصمني وراح يبعد
علشان وياه …. تملي انا بعند
البيه الننوس .. قاعد مقموص
وبيحلف قال …… وبيتوعد
على مهلك حبة .. يانور عيني
اما ازعل مفروض تراضيني
واما اغضب ….. منك هديني
مش تتقل فيها وبتهدد ..!!!!!
عندان ..؟؟ منا زيك عنادية
وهعاملك برضه …. ب ندية
أنا اسيبك زعلان طول عمرك
ولا اقضي حياتي ف مدادية
وشيطانك لو سيبته يسوقك
خليك على راحتك وبشوقك
سيباك لضميرك … ولذوقك
وانا هادية حياتي ووردية
ابعد عني …. لشهور وسنين
حب وجرب مع ناس تانين
لف بلاد الدنيا بحالها …!!!
هتلاقي زي فين ومنين ..؟؟
داعيوني عليك كانت حراس
روحي جوهرة نادرة والماس
قلبي ،، غير كل قلوب الناس
مليان … حب وشوق وحنين
راح اسيبه .. وابعد انا برضه
وهلاقي راحتي .. اكيد بعده
اللي يقدر على بعدي يومين
لسنين انا هاقدر على بعده
وعناد بعناد … البادي أظلم
ماهو من اخطائنا بنتعلم ..!!!
ولا تتكلم ………. ولا هتكلم
وفراقنا لحبنا ……….. بيهده
