صور ياسامي ….. قصيدة عامية بقلم عبير عبد المنعم
صور ياسامي ….. قصيدة عامية بقلم عبير عبد المنعم
كرهت الكاميرا وعيونها
عشان حكاويها وجعاني
عيون كانت بتضحك لي
وايد في الرحلة مسكاني
وقلب اخضر ومداري
وبيداري ألم جواه
خلاص فض الطريق منه
مكانه بيبكي ومكاني
أنا حسداك ياموت ياللي
عرفت تنقي أحزاني
لو اعرف يوم صورنا
تكون طوفان بيهد في كياني
ما كنت أجري عليك واحضن
والاقي عيونها شيفاني
أنا حزني حنين طاغي
وشق القلب مليون شق
كما قلبك ضعيف جدا
فمتحملش ضاق واترق
أنا برضو كمان زيك بحس بقلبي
متحسر ومن حسرة لكسرة كمان
ومش هقدر
أعدي الصورة والمنظر
ومش هقدر اكمل رحلتي بدونك
وانا مرتاحة للأيام
ف اي كلام ملوش معنى
كرهت الكاميرا وعيونها
دفنت القلب والاحلام
ودا مش شعر ومعدي
دا حزن اخضر سكن قلبي
