الفتوة …. قصيدة عامية بقلم الشاعر / محمود السيد
الفتوة …. قصيدة عامية بقلم الشاعر / محمود السيد
في الشعر انا حد فتوة
مش بالقوة
إسمعني يا ابني انت وهو
وبلاش تقفيل .
الشعر دا انا واخده تحدي
طب مين ادي
انا وارثه عن ابويا وجدي
شاعر عنتيل .
تسمعني مرة تقول حاوي
واد غلباوي
ليه لأ ما انا أصلي #قناوي
شاعر وتقيل .
وصنايعي في الشعر بريمو
ربي يديمه
انا أصل حرفي على قديمه
ومالهش مثيل .
انا حرفي زي البقلاوة
حلو حلاوة
وتملي بيزيد في غلاوة
وفـ طعمه جميل .
في الوِحدة ده بيكون وَنسي
شايفه رومانسي
يشهد چاهين ويا التونسي
مع عم خليل .
معروف ومتسيط جامد
مش باتلامض
انا قلمي عمره ما كان خامد
ولا كانش بخيل .
ومش غرور مني يا عالَم
ربي العالِم
بالعكس ده انا حد مُسالِم
و ده بالتحاليل .
لو جيت لي في الشعر اتحمل
سِد وكمل
لا هاسمي ولا عمري اتجمل
إنسى التطبيل .
الشعر يعني وبلا قافية
مش بالعافية
ولا عمره كان وزن وقافية
إفهم يا عويل .
الشعر إحساس يا اخوانٌا
جيبتوا آجلنا
مش رص طوب عم البنا
ولا عـ اللي يشيل .
الشعر لو كان يوم ينطق
كان منكم طق
وصوابعه كان دخلها فـ شق
و ده بالتفصيل .
دي نصيحة مني هاقولها لكوا
طولوا بالكوا
ده الشعر رزق وجاي لكوا
حسب التساهيل .
ــــــــــــــــ
