الجلابية شرف ….. عامية بقلم حسن أبو عرب
الجلابية شرف ….. عامية بقلم حسن أبو عرب
الجلابية شرف
والهيبه فى العِمَّه
انا شُوفت ياما بِدل
بتدارى ناس رِمَّه
لابسين عباية الشرَف
لكن ياولدى لصوص
دا الفلاحين الكرم
والطيبه والهِمَّه
وان كان سكنهُم عشش
جدرانها قش وخوص
فى رباط مع بعضهم
والبركه فى اللمه
فى الفَرْح وف حزنهُم
بنيان وصار مرصوص
الجار يوِد الجار
والخالَه والعَمَّه
وبيوصلوا الأرحام
من بحرى لما لجُوص
دا الرزق من ربنا
موهوب وللعامَه
مين اللى قال الغِنَى
كان جاه وكُتر فلوس
يبنى الغِنَى فى الشرف
والرَّك ع الزمه
اعصار ياكِبر البشر
أهلَكْت ياما نفوس
فلاح وبانى الهرم
والنهضة للأمه
للحق جاد أزهرى
شعراوي ويا طوبار
بالعلم صبحوا شموس
دول فلاحين مننا
عُلما وناس قمه
دى الجلابية أبيه
والعَمَّه تاج للروس
