التسامح …. شعر عامية بقلم أشرف البنا
التسامح …. شعر عامية بقلم أشرف البنا
ماتستغربش م الدمعة
اللي بتنور في عين صاحبك
بقلب سليم
أنا يا صاحبي ليلي قديم
باجرجر أملى ف الضلمة
بتتسحب دموع عيني
تحلي مرارة العتمة
تنبت م الليالي نهار
يربى ف حلمنا ويرعاه
يفوقنا … نقول الله
ماتستغربش يا صاحبي
من الدنيا و م الأصحاب
من الخير اللي كان يوصل لحد الباب
لا كان ف الحسبة رد جميل
و لا تعليل
ماتشتغربش م النكران
مانيش زعلان
بالملم روحى م التوهان
وباتمنى أعيش انسان
يلم حدود سما بحالها
بكل نجومها و غيومها
في نظرة عين
ولا يطمع فى غير ضحكة بغمازتين
رسمت سحابها ف البرواز
حمام هزاز
بيحدف للقلوب جناحين
عبير و رزاز
بتعلى معاه
و لا حول و لا قوة بغير الله
ندرت الروح و عيشي وملحي للأصحاب
بلاش تنظرلي باستغراب
أنا مش حمل فص عتاب
أنا حضني شبيه البحر
بتتفتح دراعاته لكل غريب
ولو موجة تبات عاصية
أقول يانصيب
لسان ذاكر
مسلم للقضا وشاكر
لسان بيشم ريحة الحق
ماهوش خواف
يزيد القهر علي جوفي
بيتمرد يصيبه جفاف
يامركب واقفة مطوية
على حزنك
أنا حضنك
تعالى وعبى حنية
عيونى القلع والمجداف
ما اقولش العيب
و با نصب للصحاب مقامات
بخور النية و سحابه
حصاد كرامات
و قلبي براح
يبات سواح مع الأحلام
و يتشبه لبرج حمام
ينادى سلام
و يعشق كل بنية
و بيلاغي الصحاب و الناس
تعالوا و صفصفوا النية
و حكمة نبض شريانه ..
(علامة فرحنا فكرة مجاورة شيوخ وأوليا )
تحوم بين النجوم في سماه بعفوية
ياريت يا صاحبي تحسبها
بلاش تأنيب
حيطان الدنيا ألف خليل
وقع واحد
بلون جاحد
وزيف الحق والتضليل
لا كان جابر لكسرتنا
و لا ساند ف حسرتنا
و لا واصف لرأي طبيب
مكانش لبيب
و م الآخر
مالوهش ف حسبتك ترتيب
عيدان الحق
مش مربوطة بكيانه
ولا حزمة لأوطانه
ومرجوعنا لحكم الله
لقا الأصحاب وفرقتهم
بيحكمهم قدر في حياة
تعالي نعلي ضحكتنا
نكركرها
نقول الله
