سالب واحد ….شعر عامية بقلم عبد الرحمن الكحلاوي
سالب واحد ….شعر عامية بقلم عبد الرحمن الكحلاوي
لما دخلت انا وانتِ حضانة
دخلت أبلة هوايدة ورانا
قالت كله سكوت ونظام
يلا و هنغنى الأرقام
الواحد واقف مظبوط
والاتنين بتبص عليه
والتلاتة تلت سنات
مرت سنوات
ولقيت الأرقام معناها بفعل السن أوام اتغير
إن الواحد
رب الكون ومالوش تانى ولو بتعانى فاياك تنساه
هتّوه وحدك وهتعرف معنى انك أفضل لو كنت معاه
وان الاتنين
كان صبح وليله اللى بيجيله ويشكيله بدون ما بيندهله
هما الاتنين عارفين ان الواحد فيهم للتانى
أخوه وصاحبه وأهله
وتلاتة كانت أعذار موسى
دى رسالة من الخضر بإن
لو زعّلت ف يوم بنى آدم
قلبه لواحده ساعتها يئن
يرسم ضيقته أوام ع الوش
ورسالة كمان
تمنع إدمان كلمة معلش
ورسالة أخيرة بإن ساعات العذر برغم وجوده حرام
أتمنى تكونوا اتأكدتوا إن ناقصكم لغة الأرقام
لغة الأرقام
عالم بيعد فتفاصيله
وبيركز فيها ويسقيها تنبت تفسير
لغة الأرقام مواضيعها كتير
ازاى الخمسة يا ناس هتكون
كعكة بسكر
إيه دخل السكر فى الموضوع
والسبعة سبع سماوات
ولا السبعة الأيام جوه الاسبوع
إزاى اكتبلك بالأرقام إنسان موجوع
النكتة اترسمت من أشخاص بتعد دموع
هكتبلك زى ما قولت اتنين
ناقص واحد
علشان تحسبها تلاقى الناتج
بيساوى وحيد
هكتبلك صفر ورا الواحد علطول
لكن فى مكانه بعيد
أكتبلك كام
علشان تفهم إنى اتعودت على دموعى
أنا آسف جدا
على واحد قرر يبعدنى
وشيّلنى هموم شرط رجوعى
على أوفه بودنين بيشيلها
الواحد
وبيشيل وياها التانى
على تهمة إنك سبب الضيقة
وان حبيبك بيعانى
على نفسى عشان
تقريبا استهلكت كتير م الهوا
كان أولى أسيب منه شوية
أنا آسف على حالتى الجاية
على موتى عشان
كتفك وجعك وانت شايلنى
على دمع مراتى اللى قاتلنى
على صوت ابنى اللى انا مسمعتوش
على واحد حب وبعد
سنين الحب اكتشف انه محبوش
على بعض قصايدى اللى اتعودت
اضحك فيها
كات كدبة ودمعة وبداريها
دلوقتى خلاص
أنا هعمل م الأرقام أشخاص
هرجع بيهم
وهبطل اعد لقدام
علشان الطبع يا ناس غالب
عدولنا الواحد والاتنين
لكن خبوا علينا السالب
