شارع معروف … شعر عامية بقلم حمدي موسى
شارع معروف … شعر عامية بقلم حمدي موسى
خلاص ياعم مش كاتب ومش سهران
هنام بدرى واشوف لى حلم أيا كان
هيعمل ايه ياعم الشعر مع عالم مهوش دريان
بقي آلة تدور بالزيت تدور بالغاز
فتاخد م البشر روحه فيتحول لشئ تانى
مهوش إنسان
أنا كان قصدى إنه الشعر..ممكن يعدل المايل
فابتحايل على قلبي يقيم القسط فى الميزان
وذنب الحب علي جنبه…يشوف له حياة
يروح للصمت يمشى وراه
وخليه ينفعك ياخفيف ..
وورينى هتعمل ايه بقي فى الصيف…..
وريحة الرغبة بتهفهف
وورق العشق بيرفرف فى كل مكان
وناس رايحه وناس جايَّه…وناس بتسافر المية
وناس بتحب إلا شعور.. وناس بتحب وشوية
وناس بتغش فى الإحساس …
وناس بتغش فى النية
ساعتها الشعر هيذلك وهيقولك مفيش اختام..
وورقك ناقص الأحلام
وعاوزين إمضا للأيام وورقة دمغة وقصيدة وهات ضامن
ولو لك ضحكة فى الأول هتاخد ضحكة فى التامن ولو عاجبك وورينى هتعمل ايه
بيروقراطى ..
ولو هتجيب له جبنة قديمة وحراتى.
وتعمل له على راكية عيونك شاى
انا معرفش تيجى ازاي….هتعملها وهتطاطى
عشان يرجع ديموقراطي…دا مش مضمون
رشيد الشعر مات دلوقت فيه المأمون
وقيس هذا الزمان فاسد ومش مجنون
خلاص ياعم مش كاتب….
وهنريح كدا كام يوم خلاص هنصوم……
دا حتى الشعر بقى غالي وطعم الحرف فيه لاذع
معانى الحب مخلوطة بعشم واسع
ومش كل اللي قالوا ياحب وصلوا الدنيا فى التاسع
معادش الحب زى زمان
معادش اخضر. ولا اللي يحب يتمخطر
ويمشي يبان عليه فرحان
زمان الحب كان مكسوف…بقي دلوقتى علي ناصية ( شارع معروف ) أمام ( العبد ) بالألوان
منيش كاتب عشان ترتاح
ورحمة أمى مانا كاتب..كلام وخلاص
أنا استفتحت من بدرى خلاص مش عاوز استفتاح
وبنبيع شعرنا غناوة. ….ومش واقفين على كلمات
فانا باكتب رصيد للقلب قبل مايمنعوه م الذات
وبينى وبينكوا انا قلبي بيبقي نشيط
اذا حطيت عليه فلزات
ومن مادة وحشتينى نضيف نترات
واذا خطت عليه والدة سبع مرات
وانا عمرى ما اغش الحب
ولا هاجرى ورا قنوات….. تبيع البكر بالثيب
وتعمل م الفسيخ شربات
فانا اعتبرونى شاعر مات
وبس خلاص
