سنينا عجاف … عامية بقلم محمد ريحان – الباجور – المنوفية – مصر
سنينا عجاف … عامية بقلم محمد ريحان – الباجور – المنوفية – مصر
كلام بالعرض كلام بالطول
كلام والله مش معقول
بقينا نخاف من المجهول
بقينا نخاف من السايب
وبرضو نخاف من المربوط
ماعادشي اي شيئ مظبوط
خلاص بقت الحياة فوضي
وناس بتصلي بالظاهر
بدون حتي ماتتوضي
وناس عاللقمة بتعافر
وناس تكنز ذهب .. فضة
وناس تقتل بكل برود
وناس بتموت من الخضة
وناس عايشة علي الاسفاف
سنيننا عجاف …
بنتغطي بألف لحاف
وخايفين مرة يوم نتشاف
بناكل لقمة ناشفة وحاف
برغم الدنيا وبراحها
لكن بتضيق علي المخاليق
لابتدوم مرة افراحها
ولاحاجة تبل الريق
ولو واحد مابينا جريئ
وعلا صوته واتكلم
عن الظلم اللي بيعلم
علي حياتنا
يبات فورا في تخشيبة
ويدخل عنبر المساجين
دا ياما السجن فيه مظاليم
بدون تحقيق
ولاحتي سؤال واحد
وليه تصرخ يابني ٱدم
مابتخافشي ؟؟؟؟؟؟؟؟
اكيد دلوقتي راح تتشال
علي الأكتاف
وتهتفلك جموع الناس
بالف هتاف
وتترحم علي روحك
صراخك ده مالوش معني
ولاحدش هيسمعنا
ولايدرا بأوجاعك
ولا تتشاف
أبص واشوف
علي ناصية شارع زحمة
لقيت الكل بيزاحم
علي عربية بتوزع
شوية رز أو سكر
وعلبة تونة او لحمة
وفجأة ظهرت الزحمة
مافيش رحمة مابين الناس
تعبت خلاص وخدتلي جنب
لقيت رسام واقف يرسم
ملامح صابها الاحجاف
ويطلب مننا التوقيع علي اللوحة
فكان توقعينا بالاجماع …
…. “سنيننا عجاف “
