في غياب الروح … شعر عامية بقلم مدحت رياض
في غياب الروح … شعر عامية بقلم مدحت رياض
أنا لسه هناك
وف إيدي الحلم
اللي اتفسر
ومعايا القلب
اللي اتكسر
من عزم الريح
وبقلب جريح
وبإيد بتشاور بتغطى
وكأني سعيد
وكأن الأيام كات سهلة
وجه فجر جديد
أنا حد بيكدب على نفسه
والأغرب إني بصدقني
وبرسم أحلام
وبطير ومحدش يلحقني
في لحظة ما بنام
والصدمة بتبدأ مع روحي
مع أول ضوء…
بتلم الغايب في جروحي
وساعتها بفوق
على واقع نبضه مهوش طالع
والعمر بيمشي وموش سامع
ولا صوت إنذار
وكأن القلب وأحزانه
بيقيدوا في نار
والفرحة وقلبي المتجرح
فيه بينهم تار
أنا لسه هناك
لحظة ما المركب وشراعها
إنقسموا لنصين
النص مسافر ومودع
والباقي على الشط اتقطع
ييجي مليون آه
لا هو قادر يركب ويسافر
وبقيته مع الموج بيعافر
يوصل وياه
أنا لسه هناك
وحشتني الضمة لأحلامي
وكانت في إيديك
وحشتني الضحكة في أيامي
وكانت لعينيك
أنا لسه هناك
مستني اللحظة اللي تقرب
وأكون وياك
وأحكي لك إيه كان من بعدك
واعيشه معاك
أنا لسه في لحظة ما فارقتك
مستني هناك
فيه أسئلة ملهاش جواب ؟
برضه إحتمال
إن السؤال ميكونش ليه
أبدًا جواب
فمتسألوش وإفتح عينيك
حاول تشوف
يمكن نوفر قبلها على نفسنا
حبة كسوف
أصل الجواب باهت حزين
مليان بخوف
واستامبا واحدة متتنسيش
هي الظروف
فيه أسئلة معناها
يفتح في الألم
ولا ألف باب
فيه أسئلة تبدأ عتاب
فيه أسئلة فعلا صحيح
غير مرتبط بيها الجواب
فيه أسئلة من حزنها
بتموت على طرف اللسان
في سؤال كمان
لو متجاوبش
يعلق الروح بالمكان
بتموت هناك وقت أما كان
وكأنها رافضة الإجابة المبهمة
من غير بيان
في سؤال بيطلع م السكات
مبننطقوش
وسؤال على رموشك يبات
ومتسألوش
بتحطه دايمًا
جوه بند المحظورات
في إجابته يمكن
فيه شعور هتحسه مات
وتلوم لسانك ليه مقالش
وغيره قال
برضه إحتمال
من ألف مليون إحتمال
إن الجواب ميكونش ابدًا
ليه علاقة بالسؤال
