الديك الشركس … شعر عامية بقلم فتحي نجم
الديك الشركس … شعر عامية بقلم فتحي نجم
ع الفرن البلدي بتاع بيتنا
تقفيصه لفراخ بتصاصي
والبط بيلغلغ في الأصله
والديك الشركسي عاصي
بيتنمر علي كل حوان العش
وشليتة التبن يبهدلها
قال أيه هايبيض….. شوفتوش الغش
طلع ابن لذينا ومتخفي
لاجل يقص ذكيبة الغله
المعقوده برباط من تيل
ويخزن ف جنابه الميا الجايه
من بطن النيل
وأدانه بيزعق ويعكر
نُقر الميا المتفاته ف عيدان الزرع
بيفوت علي كل خضار الجسر
ويتمنى لها القلع
فينام النسر
تحت عباية المختار
فتبان في النشره كدبة إبريل
وأبويا بصحي الفجر الكسلان
من نومته
ويقول لليل النعسان روح واتاخر
ويلف العافيه ف شاله الحر
ويروح ويجر جنب خياله خيال
ويصاحب الضوء للآخر
ويخبط ع الصبح لغيطه
متسند علي كتف الشمس
بيناجي بسن الفاس
الشتله النايمه ف حضن الهمس
بيدادي الفرع المايل
علي غصن الأمس
بيحايل كل ساعات النور
تفضل صاحيه
كان ابويا بنايه علي الطامبور
فايغني لكل نبات الغيط
فاتبات زاهيه
ويشد … من عقب الحلم أماني كتار
كان ناوي يخيط روحي
ويزرع لي ف إيدي مشاتل شعر
وحروف العشب تصير أشجار
كان ابويا لوحده يصد تتار
أنا وارث منه سمار وشه والأصل يمد
ومن امي الحلو بسكرها وبشوفها
ماهو جايب من سابع جد
انا روح محبوسه ليلاتي
بتفرهد لما بشوف الظلم عيان
وأعافر جداً واتمرد
واشاكس لوميت تِعبان
وأغمي عيوني للحق يفوت
وافتَّح للظلم…. أصل الظلم جبان
وارسم علي خد سجرة التين
قلب وسهمين
وأحوش كل بكايا
لاجل اسقي الخطين
واشحت قوتي بمد الإيد
رغم دقيقي مالي الدار
أيوا حقيقي..
ملعون أبو أم السمسار
والبوح المخنوق بيعيط دم
فابشيل الهم
رغم زعيقي عشان البنتين
وضميري يصرخ يرتعش فين الخلاص
ليه الرصيف بالي
ليه الطريق خالي
ليه السكوت حالي
ليه الوشوشه ماعدتش واصله للودان
ليه الدردشه صوتها ماطلعش الميدان
ليه العقول الضيقه
هي اللي طابه في الميزان
أغنيتي خضرا
لون الزرع الحلال في الغيط
مندرتي أهي واسعه
وسع القلوب الحارسه لعتب البيت
دراعي صاحي
بيحمي النخيل والخيل
عرقي الطاهر بيمطر م الدماغ للديل
علي جسر روحي فاردت
لقبلتي مصلىٰ
ومن البُكا اتوضيت
بقلم فتحى نجم
