من غير عنوان … شعر عامية بقلم محمد عبد ربه طه

من غير عنوان … شعر عامية بقلم محمد عبد ربه طه

المشهد قاتم في عنيا
وسواده بيرسم ليل شارد
لنهار مش جاي
والبنت بتحسب في الوارد
حبة جنيهات
هيكفي ازاي!
والدنيا بتوسع قدامي
لعيال في الحوش راحت تلعب
وعجين مستني النار تولع
فـ شروقة فرن وست عجوز
ضهرها محني
ساكته ولا يوم قالت بتعب
كباية شاي
وبنات رايحين
راسمين الفرحه نهار مسروق
وطريق بيضيق
يوسع حبه لكن مخنوق
زي دموعنا
بتذوق رموش محتاجه تنام
يمكن تحلم
بفرح وعريس
اليوم عدى
والمشهد عمال يبعد
والضلمه كابوس
وبفتح عيني لقيت زفه
لبنات راجعين
لبسين ابيض
وكتير واقفين
من غير فرحه
والنار بتزيد
حرقت احلامهم ودّرات
ف شروقة فرن هناك مطفي
وعجين ملتوت
وعجوز بتنهنه وتقول لي
دول يابني عرايس للجنه
طايرين لـ هناك
….
محمد عبد ربه طه
2025_06_29

اقرأ باقي العدد ٢٤