حمار جحا …. شعر عامية بقلم الشاعر / محمد الساعي
حمار جحا …. شعر عامية بقلم الشاعر / محمد الساعي
مفتتح
العقل رافض أي شيء يلهمك
والآه تمرجح في القلوب مرجحه
يا زمن وعاجز إني مره افهمك
إلحقني يالاَّ بسرعه يا حمار جحا
يا ابو الفلاسفه كلهم .. ياعمهم ..
وعم كل الفتَّايين
مش محتاجين ..
غير بس حكمه من بنات أفكار خيالك
وحياة عيالك مانت ماشي..
غير لمَّا بس تقول لنا
رايحين لفين ؟
يابو عقل معجون باليقين
رايحين لفين ؟
على سكه مفروشة بأمل ؟
ولا على قهر السنين
على صوت غناوي بتتكتب
ولا على صوت الأنين ؟
رايحين لفييين
وايه العمل ..
مع ناس بتغرق في الوخامه والكسل
مع ناس بترضع صبرها علقم
وبتقول دا العسل
مع ناس حياتها بتختصرها ف كلمتين :
” تمام .. حصل “
ايه العمل ؟
ما ترد ساكت ليه ؟؟ .. ما تنطق
ولا على بختي أنا
طبّيت وما حطتش منْطق
بطرف عينه بصلي .. وهز الودان
قال كلمتين:
ــ طول ما انتوا عايشين بالنطاعه ..
والمياعه .. والوداعه
أبشروا
راح تفضلوا في اللي انتو فيه
أشباه مسوخ متنتورين ع الأرصفه
من غير حياه
ولا رد فعل ف موقفين لله
ولا حتى لمحة إمتعاض
ولا اعتراض على وضعكوا الحالي
ياعم انا مالي
غُلُبت أشرح واوصف الأحوال ..
لعقل ماهُش سليم”
والصمت ساد
وفجأه قال وبصوت غشيم :
ــ قوم يالا هات – ليا وليكم – ..
حزمتين برسيم
