خلف الجفون …شعر عامية إيمان حجازي
خلف الجفون …شعر عامية إيمان حجازي
الدنيا خلف الجفون عيشة
تشبه جمال طاغي مداري بالبيشة
الدنيا خلف الجفون عالم
أحاسيس مع مشاعر مكتوبة للهايم
بتحيره
ما تخيره
يا هلترى هيفوق وألا يعيش نايم
الدنيا خلف الجفون مسرح
تماثيل بتتطوح
عالم بتيجي يا خلق
والتانية بتروح
الدنيا خلف الجفون سيما
بنت وولد وغرام حاكم وتقسيمة
أفراح على أحزان
الدنيا دي ألوان
وأراجوز في وشه شنب يا خلق بريمة
الدنيا خلف الجفون دنيا
قالوا عليها كتير فانية
حلوة ومتغندرة
معدولها كان مايل
وتعدله في ثانية.
الدنيا خلف الجفون
أنت وأنا
فرحة سنين وسنين
مشبوكة في سوسنة
دي وشوشة شفتين وقصيدة متلحنة
رسمتنا ع السكة هنا
وبسمة متصورة كتبت بداية عمرنا
