وابـور الجـاز ……عامية بقلم الفلاح الفصيحمعوض حلمي -منشأة بطاش تمي الأمديد -دقهلية
وابـور الجـاز ……عامية بقلم الفلاح الفصيح
معوض حلمي -منشأة بطاش تمي الأمديد -دقهلية
جاي ومعايا وابور الجاز
كانت كوشته نحاس لمـيع
كان بيناكيفــــني وبالألغاز
كان كباسـه الجــلد فظـيع
كـنا بنعــمل شــاينا عـليه
ويدفيـنا في ليـــل البـرد
كنا بنصحى ونمـدح فـيه
كان بيــــلم العيـــله بجد
كان بيسوي لابويا قوالح
وكان بيسخن سيخ الجوزه
لاجل يضيف عيسى وصالح
كان بيغيتنا ف وقت العوزه
آه لو صادف حـلة محشي
كات بتفور من ناره الحاميه
وأمي الدايره مابترتاحشي
خايفه لا يحرق ليها الباميه
وماقولكش عليه لو شط
كنا بنســـمع صـوته يغني
لمــا بيحــــضن حــلة بط
واحـــنا نرد وراه ونغــني
ولما يعـدي كمــال يسألنا
كنا نقول له دا عال العال
كان دكانه ف وسط بلدنا
جنب زريـبة عمـي هــلال
كان بيحمص عيش القمح
ياكل عمي وخالتي الجاريه
وامي الضهر بترمح رمح
وبتشوي لنا العصر بساريا
واحـنا وابورنا ميــه الميه
والحمـــاله حــــديد جـبار
شايله الطشت ملان بالميه
لاجـل نحـمي عيـال الدار
ولما بيكتــم أو بيزرجــن
تلقى الإبرة تسلك زوره
يرجع تاني قوام ويدندن
تفرح حلل الدار وتزوره
فاكـــــر لمـا هبـــابه يزيد
تلقى الحله سوادها غطيس
عايز جـازه تمــلي جــديد
لاجل النار بحمارها تهيص
