انتهى العرض …عامية بقلم اشرف الشناويشاعر عاميه البرامون – المنصوره
انتهى العرض …عامية بقلم اشرف الشناوي
شاعر عاميه البرامون – المنصوره
انتهى العرض يامغنواتي
ومين راح يسمعك بتنوح
افرد جناحك عالسطوح
وطير وعشش عالشجر
والعب زي العيال في المطر
وغني كل يوم غنوه
دا لحنك عالوتر معروف
لف الغيطان كلها
ولا توته باين ضلها
دا الفجر داير في البلد مجذوب
والصبح ياما حدفوه بالطوب
انتهى العرض يامغنواتي
والزمن مقلوب
ارمي الشبك
يمكن ماعدش يخيب
واوعاك تسيب الأمل بايت
على التوضيب
مين اللي قام الصلا في الخلا
خلا الإمام بقي ديب
مين اللي دق الأمل خلاه
في عينا غريب
مين اللي خاد الغنا وساب
قلوبنا تشيب
انتهى العرض يامغنواتي
مافضلش غير تشاطيب
افرد في طولك قوم
واملا الغيطان بالتوت
الحلم وسط الغنا
عمره في يوم مايموت
والضي لو يتحبس
من خرم باب بيفوت
………………
