كلمة … عامية بقلم هنا سعد
كلمة … عامية بقلم هنا سعد
هستعيذ من شيطانك
ياشعر عمره ما كان له كلمة
كل يوم عنك بتوب
وبعدها توسوس
بكلمة
أنت بتمرجحنى ليه
بعد ما أحلف مش هقولَك
و أكد الحلفان عليه
يسرسبني شيطانه
بكلمة
أَقفل الأدراج بتاعتك
والأجندة خبيتها فيك
فتلاقيني من النتيجة
سحبت ورقة
والكلام يجي يناديك
والكلام بيبدأ
بكلمة
ورقة وراها ورقة
ويوم يجر يوم وراه
والكلام لمنتهاه
الكلام يبداً يناقش
والحروف تفضل تحاور
والحوار يسخن مابينهم
وكل ده بدايته كلمة
فاكر لما ف يوم بكيت
قولت ليا اكتبيني
قلت هتطبطب عليا
ووعدتني مش هترازيني
لا الدموع نشفت فى عيني
ولا الكلام كان آخره
كلمة
فاكر لما ف يوم فرحت
وكانت الفرحة كبيرة
الحروف فرحت معايا
والجمل عملتها سيرة
فالكلام خدني أسيرة
وان طلبت يفك أسري
الثمن، اكتب له كلمة
الكلام مش بيخلص
والحروف ولادة دائما
مهما احلف مش هقول
الحروف تفضل تدندن
والحروف تمسك فى بعض
فالحروف ترسملي كلمة
والكلام يشبك فى بعضه
والجمل ترسم طريق
كل ما يمر فيا
أحسبه قشة لغريق
والكلام يسحب ايديا
أحسبه طيب برئ
أبدأ أتسرسب معاه
أشكره ،فيقوللي كلمة ()
والكلام يجيب كلام
ولما أقرر الاستعاذة
بعدها أرجع بكلمة
