رباعيات في حب مصر ….شعر / إبتسام عبد الصبور

رباعيات في حب مصر ….شعر / إبتسام عبد الصبور

1

في حب مصر اتفرش
طميك غناوي وتبر
مكتوب بمية دهب
بدل الرصاص والحبر
الميم محبة وجرس
والصاد صلاة عالنبي
والروح تروح مننا
لو مسوا منك شبر

2

في حب مصر الهوا
فوق الجبين هفهف
جمع الحبايب سوا
والهم أهو خف خف
ونشيد بلادي صبح
أحلى أغاني الكون
ضحكت نجوم السما
لما العلم رفرف

3

في حب مصر النغم
نوَّع في ألحانه
رفع الأصيل والبطل
علَّى في أركانه
أما الخسيس سمَّعه
أوجاع تهد الحيل
ابن الأصول والجدع
في الشدة بيبانوا

4

في حب مصر ابتدا
كل التاريخ أصله
بإيدين ولادك كتبتِ
الحب على أصلُه
ياللي ترابك دهب
والقلب دايب فيه
شرقك وغربك أنــا
بمحبتي واصلُه

اقرأ باقي العدد ( ٢٨ )