وأزيدك من الشعر بيت…شعر عامي بقلم إيمان حجازي
وأزيدك من الشعر بيت…شعر عامي بقلم إيمان حجازي
لما أنت جيت
كانت مفاجأة مزهلة
رقصت لها في العمر جدران الأمل
واتحزمت..
أيوة بضفاير كل بيت
العمر عمره ما كان سنين
عمري بيوت
ياما سهر يحلم
يحلم بنظرة دافية
كلمة تقول: حنيت
وأزيدك من الشعر بيت
صوت كلمتك
حطم قيود
خنقت سواعد غربتي بين عزوتي
وأدت طفولة صبوتي
تكسر بهمسك، كلمتك كل الحدود
وأزيدك من الشعر بيت
دي محبتك كانت منام
قصة غرام
صعب إن حد يفسره
ولا يترسم إلا على شط الهوى
فوق عمرنا المرمر
الموج بيتململ ويتشطر
بيتشطر على الرملة
ويتقاسم معاها الجوع
ويسقيها لهيب سكر
وأزيدك من الشعر بيت
أنا حبيت
ورغم تضاريس الزمن على البسمة
ورغم دخان
وساكن وسط نن العين
ورغم أن الايدين موش متمكنين
والشمس داخلة في مدار الحنين
لقيتني بازرع
في وريد القلب ٱبهى وردتين
تروي غصونهم دمعتين
يطرح حنين
تسمع غناوي المشتاقين
وتقول ياريت
لا كنت رحت في يوم أنا
ولا كنت جيت
ولا كنت سبت سمار جبينك
لما هلت طلتك
يسكن بياض البيت.
