نُص قصيدة….. شعر عامية بقلم حمدي موسى
نُص قصيدة….. شعر عامية بقلم حمدي موسى
أنا باكتب الشعر مش للناس ولا ف بالي
باكتب لحالي المعانى الطيبات لله
وباحاول اشرح وجع كل الفواعلية
القصد والنية الناس تلاقي حياة
أنا مش هاممنى اللايك ولاهوه ف دماغى
ولاعاوز أكتب عشان العهر والندوات
أنا حرفي ابن ذوات….. عايش في بيت عاجى
وساعات بيعمل فتوة كأنهُ ( الناجى )
شريانيا التاجى مش لاقي سكة روح
أنا احب اموت مدبوح الحرف والمعنى
يمكن أسيب معنى يستخدموه انسان
يستعملوه رحمة. ..يستنسخوه فنان
ويصدروه فكرة تعدل ميزان الكون
أنا باكتب اللي بيجى لحدى مبروحلوش
بابى مبقفلهوش قدام كلام عابر
باستقبله بترحاب الشاعر الصابر
اللي الكلام موته واتفرقت جتته ملقاش لها مقابر
باكتب ومش ع البال النقد والنقاد
ولا عاوز ابقي سلامة وانادى اقول ياولاد
الأقصى ..الأقصى
ولا حتى عاوز اجيب سيرة عن النكسة
أنا بس حزنى غالبنى وقلبى دا اللي تاعبنى
كل الحواس بتحاربنى عشان سكاتى قبيح
هذا وطن مش مريح…..الحب فيه غالي
والعدل فيه مفقود
الناس أكلها الدود من قلة الراحة
واتحولوا لصفات معجونة بأباحة
ضلوا اتجاه السير
أنا باكلم مين ؟!
.الكل فى مكانه باسمه وعنوانه
وباقول لنفسي باحبك أنتى أجمل شئ
وبرغم عوراتك وعيوبك الواضحة
بمناسبة الأضحى….ينعاد عليكى بخير
وبالمناسبة صحيح….الشعر مش توهان
ولا عمره كان مبهم
والناس لازم تفهم إن البشر ألوان
ومعانى مختلفة فى الفرح والأحزان
الشعر فلسفته..انك تلاقى زمان
يستوعبك مخطئ ويتوب عليك عاصى
يستحملك إنسان
وقبل مانسي صحيح
الشعر صوم عن كلام أصلا مالوش لزمة
فاستعملوه رمضان
