مية عفاريت……قصيدة شعر العاميه بقلم وحيد علي الجمال

مية عفاريت……قصيدة شعر العاميه بقلم وحيد علي الجمال

عفاريت الشعر الملعونة
قلبها بجهنم معجونة
أشكالها قليله ومشؤمة
وبتاخد حيز فى الصورة
تدخل بالحنجل والمنجل
تمدح في حروفك وتبجل
ويقولوا عليك المتمكن
والشعر على سطورك
يركن
وقصيدتك لجروحنا
مُسكن
راح نسكن فيها ونتسكِن
يا أمير الشعر المترجل
بنطالبك تعمل تغيير
وتلم في كسر المساطيل
الزيف النازل تحليل
والشللي العاشق تطبيل
يمدحهم ويقول ويزيد
في مجامع شعر المحاسيب
ولا ليهم مفتي وراقيب
يمنعهم في حدودالعيب
على دم الشعر المسفوح
غربانهم طلقت في النوح
وحدادي الجرح المفتوح
اكلت في اللحم المعروض
ولا قافية بتخدم في عروض
وموسيقى بترقع بالصوت
من فجر المعنى المغلوط
واختلط الحابل بالنابل
دوبنا السكر في الحادق
والتوب المغشوش بقى لايق
وإتغير في مقاس الذوق
بقصايد باله وهلاهيل
ومرارنا الطافح بالكيل
الابداع مات بالاوجاع
ومقامه اتحول لمشاع
وأهو اي بتاع يكتب سطرين
نرسم له قلوب ونقول موهوب
ونركبه سلم بالمقلوب
وبنهزم حق يبات مغلوب ..
في ناس كرهتني كتير
على الفيس
وبقيت محظور ببلوك وسور
علشان الحق يشوف النور
في قصيدتي انا واخد 100 بطحة
من نقد وتحليل ومراجعة
وما خدتش صك يقول صالحة
وبلاقي قصايد كدا تافهه
واخده أختام بتقول صالحة
فبموت وبطق من الغيظ
على حبة سجع في قصاقيص
وكلام بيطلع فسافيس
والفن إتحول خفافيش
ازاي من هدهد بلقيس
يسرقوا جنحاته مع الريش
ويبيعوا القصر لعتريس
بشهادة حبة طرابيش
ولا بصمة هتثبت ولا فيش
ان اللي سرقكم كان شاعر
عامل من توبكم درويش
ومصاحب حبه الاضيش
كان راسم صورته
على الفيس
يظهرلك وكانه ملاك
في جهنم فاتح شباك
ناعم والطيبه على عينيه
لو شوفته تقبل في ايديه
وضميره الاسود تلاقيه
معجون وبمية عفاريت

اقرأ باقي العدد ( ٣٠ )