من الأول …… عامية بقلم الشاعر / حمدي موسى
من الأول …… عامية بقلم الشاعر / حمدي موسى
أنا قررت أتحول
وهارجع خطوتين حلوين
نقول مثلا لعمنول…
واغير قلبي والدقات واحبك تانى م الأول
عشان ابعد عن الأخطاء
بلا غيرة بلا ضوضاء..واقلل حبتين أشواق
فا م الأول
ومن أول سلام بالعين وأول حضن من ضيك
لغاية أول ازيك
وايه الأخبار ….ماشوفتيش النهاردة نهار
وأى كلام مالوش معنى
آدينى باجرجر الأحاسيس ….
وبافتح للأمل قواميس
وباضغط ع القمر يمكن يحل الكيس
ويدينا شوية نور
آدينى باكشف المستور
وباعترف إن حب الأمس كان منظور
وآدينى ياستى جبت بخور…
وهنعيد الشعور تانى من الأول
وطال الليل وغيرنى….
وهجم الفكر اللي ما عقلي عبرنى
وسابنى لقلبي يعمل فيا كيف يشاء
ويسألنى وينهرنى…ويستكتر عليا الروح
ومش عاوز يبطل نوح
يروح يجى يكدرنى….ومش ساكت
وبيعيد الكلام مرات…. موترنى
أنا شوفت في هواكى حاجات !!
تخلي القلب يتجنن
تخلي الحب ذات نفسه يقول ماتغور
ياعم بلاها أشواقك…. يا سيدى ربنا يحنن
دانا اتبهدلت ست شهور
مابين البرد والولعة
ودخلت شوكة فى التفاصيل…ومش طالعة
وباتعذب.. ووجع الحلم خلي مشاعرى في الميادين بقت سلعة
يشيل ويحط فيها الشوق
هاحبك تانى من أول ما قام القلب واتحرك
وقال هيعيش ..
ومن أول ما سأله العمر عن نفسه
وقال له مفيش
أنا هاسرح بأشواقي كأنى قلب متجول
واحبك تانى م الأول
