كتاب مقفول….شعر عاميه بقلم وحيد علي الجمال
كتاب مقفول….شعر عاميه بقلم وحيد علي الجمال
وآدينى رجعت للشعرا وللاشعار
اشد في حبل افكاري
وخبي الجمر في جبيني
ويكويني لهيب النار
وارتلني في احزاني
واكررني في اذكاري
ومس الشعر في عينيه
واقطر منه في وداني
واسبح بيه على ايديه
وافصل منه احلامي
واجيبه في ضعفي
يرقيني واشيله حجاب
مع الاحباب
وارشه هناك على الاعتاب
يغطيني يدفيني
يسليني في سواد الليل
وحضن الشعر بيسعني
ويلسعني ويشكيلي
يفرقني ويجمعني
ويشتمني ويرضيني
يدخلني في حروب
الوهم
ويرميني عليهم سهم
يقلبهم يكدبهم يكدرهم
يهجرني ف مضاجعهم
وفجأة يسبني
يتبخر ويتأخر
واشوف نفسي
عديم الفهم
واكلم كل شئ جنبي
لعل الصدفه تخدمني
ويطلعلي كما الجني
واولع ف القصيدة البكر
وبخرني فحلقة ذكر
وطلسمني وترجمني
وعلمني آيات الشكر
بلمعة فرحة النني
وكام تعويذه
تسطلني وترضيني
ويفتح درج افكاري
يعلمني اكون ساحر
على رف الوجع ساخر
عن الساده بنترفع
وعند الساسة نتأخر
ماليش فرعون
ولا خافشي من الكراكون
وتتبدل شكوكي ظنون
بتنهيدة ومزيكه واستيكه
لحالة جديدة فبريكة
وحبر قديم لمنشور
السبع مراسيم
وسكينه في حلم قديم
ومركب ستنا الغوله
ف حته حيطانها
مجهوله
في طين البعد موحوله
ولسه بتلعب الاوله
خسرت العشرة مقفوله
ومتصور مع الازمات
وكام صورة لبنت جميله
بضفيره
في عين الصيره تتمشي
فتحرسها وتخطفها
على حصان والولا بركات
وجنتها في طلتها
وضحكتها بتسمعها
السبع سماوات
وطقت فكرة ف دماغى
اخدني عافيه بدراعي
وسلمني لاوجاعي
في شعر الفاجأه
صبووولي دموع العين
على سطوره واعرابه وتعليله
انا معرفشي مفعوله
ولا بغزل خيوط نوله
ولا بعرف كمان غيره
وقفت استنى توقيعه
وكل ما حد يسألنى
اخبي الشمس في النني
ووشوشني على استحياء
ولو فكراني عرفاني
انا لسه كتاب مقفول 🔒
