فضفضة … عامية بقلم منى فهمي
فضفضة … عامية بقلم منى فهمي
مش لازم اموت
عشان الكون يشعر بيا
يوم ما اسكن كده تحت ترابه
اصل الانسان بيموت دفعات
ويفرق روحه لاحبابه
ويحس اوام الكون ده فراغ
يتسرسب من تحت كعابه
يشوف مين عابه
على طيبته وحنية قلبه
مع ناس اصلا
مش بني ادمين
بيحاسبوا الغير
على افعالهم
ناسيين دايما
ان الرحمن
وهبنا ارواح
بتطير طيران
احرار
مش كله عامل فيها القاضي
يحكي ويتحاكى على الفاضي
يارب حوش عنا عبيدك
ويارب تخليها ف حالها
انا اصلي تعبت م الاحزان
والدنيا اللي اتشقلب حالها
الطيب فيها ياناس متعاب
يتعاقب على حسن النية
ويعيش ف الكون
بجناح مكسور
ولا يوم بيحس بحنية
انا ربي خلقني من الاحرار
وهكمل باقي العمر ياناس
بالطيبة وبحسن النية
