عكس المألوف …. بقلم شاعر المحروسة / أشرف البنا
عكس المألوف …. بقلم شاعر المحروسة / أشرف البنا
أنا غير الناس
تغريني حاجات
عكس المألوف
عاشق للخوف
لما يرجعني لعين أمي
بتبرق لما بتحكيلي
عن راجل رجليه مسلوخة
حارس ع السلم مستني
أطراف الروح بتروح مني
والشعر يشب
لحظة ماتدندن وتغني
طلعت أدب .. نزلت أدب
لقيت الديب بيقزقز لب
ويصارع ف الأم الغولة
ودي ليها عيون بتطق شرار
وساعات حولة
وساعات تتحول كتلة نار
أسرح ف الدايرة المقفولة
ماعرفش قرار
أتكوم وأغرق في حنانها
ف تطبطب على راسي بخفة
ماتخافش ياواد
أتغطي ونام
أصل أنت ياقلب أمك سابق
سنك وجرئ
جن مصور .. وبتتنقور
بكلامك على كل المخاليق
وأمك بتخاف عين الحساد
استهدى ياواد
كن شوية
النوم يتمرجح ف عينيا
قفطانه حرير
رياحينه بتبعت أنسامها
على طرف سرير
يخطفني ف حضنه لكوابيسي
يسرح ويطير
وده عشق الخوف
اللي مكتفني بعشق زمان
أصل انا انسان
تغازلني حاجات عكس المألوف
