صوت أوجاع ….شعر عامية بقلم / أحمد مغربي
صوت أوجاع ….شعر عامية بقلم / أحمد مغربي
جُم نقلوا العفش لقيتني صحيت
على صوت أوجاع
كات أخر ليلة فى حضن البيت
وياريت ما اتباع
مين بعدك يابا يلم الشمل
ويقيم الحيط
مين يصحى يصلي الفجر إمام
ويصحيِ البيت
مين يسأل عني أنا غايب ليه
ليه بس مشيت
طب عامل إيه بعد رحيلك
ومكانك فين
طب ينفع لو عوزتك أجيلك
ولا أسأل مين
أنا كل ما بيرن التليفون
يسألوا فبَقول:
لساك ما رجعتش
م الجامع
فيقولوا مجنون
ومازلت باحس
إنك راجع
وبنادي عليك
علشان طول عمري أنا عيشت زمان
مطمن بيك
إطمن يابا
أنا بادعيلك
أنا عايش ليك
وباعلِّم علم اتعلمته
بِحُب على إيديك
مش فاكر ليك غير كل جميل
ربنا يرضيك
