صك المغفرة …. شعر عامية بقلم نوجه سيد
صك المغفرة …. شعر عامية بقلم نوجه سيد
كان كل يوم
يشق صدر الدنيا
ويغرزني في نن عين الإمنيات
يغزل من عمره شال يسترني
يحكيلي حكاية
من حكاوي الطيبين
وانا كنت طفلة
بتعشق الحواديت
يعلمني حكمة تبث في روحي الصبر
فا تطفي خوفي من الزمان والناس
حببني جدآ ف الشوارع .
علمني أخاف من ربنا
واعمل حساب للذنب
علمني احب يمكن يلقأني غنوه
ينشودوها الخلق
كنت احفر بضوافري في صدره
افك زراير روحه
واستخبا من الزمان والناس
فايقوي ضلعي
أنقر بعيني في السما
لحظة تجلي
تفسح لي حضن هناك
ابنيلي فيها بيوت
مفهاش قلوب بتعري خلق الله
وتكشف العوره
وأنقر في كف إيدين الدنيا
. زي الطيور
زي الطيور وخلاص
ف يحضني كف الدنيا ويعلمني
افضل طول الوقت أتعلم
وأطير بقلبي البكر والعفوية المفرطة
يمكن أسابق خطوة الأيام
وكبرت سنين سنين كتير يارب
علمني تعبي
احقن في قلبي الصبر علي إنكساري
وإنتظاري لرحلة الخوف والعلاج
هاعود يارب
ولا خلاص اتقطع الحبل السري
مابيني وبين العالم
هاأرجع لورقي وكتاباتي
أرجع لحضن الرصيف
واترجم الوصل
ما بين الخلق وبين الموت
تغسل دموعي الشوارع ف اتوب
ابص للسما بخشوع
تمنحني صك المغفره
استمد الصبر م الحبر الأزرق ع الورق
يظهر قدام الخلق قوة وصلابه
رغم إني بموت جوايا
و اضعف من وليد الطير
ف انسج من خيال كتاباتي
براح يساع الكون
ف اشرب من كف إيدين السما الصبر
واشرب من كف إيدين الدنيا الحرية
هااعود يارب
وكان يقيني بربنا أقوي
