سحر الشوف …. شعر عامية بقلم /أحمدرأفت
سحر الشوف …. شعر عامية بقلم /أحمدرأفت
ضرير سارح بيتغندر
في أرض الشوف
بيتحدى بعكازه الضلام والخوف
ولما الدنيا بتعتم ف وش الناس
ينوَّر للي مش قادر
بعينه يشوف
ضرير غلبان
بيشرب غلبه من كاسه
ولو صادف في يوم الذل
يدوس الذل
بمداسه
ولو حافي ..
ما بيهموش..
مادم قنديله فوق راسه
وف ضلوعه سنابل خير
راويها بنبض إحساسه
بيرعاها ..
ويغرسها ..
على عتبة حيطان ناسه
ولو عشش عماه في الكون
قوام تلقاه
يهش عناكب الضلمة اللي ساكنة سماه
يدب الأرض بعصايته ..
تنبت نور
ماهوش ساحر ..
لكن سحر الرضا جواه
ما حدش شاف ضرير زيه
بيضحك ضحكة من فضة
بيزرعها في ليله نجوم
ومن أنوارها يتوضا
ويمسح عن عيونه الويل
ويجلي القلب لو صدا
