حضن فاضى عامية من قلم الشاعر / عبد الرحمن الكحلاوي
حضن فاضى عامية من قلم الشاعر / عبد الرحمن الكحلاوي
أربع حيطان ساندين على دراعى
ودراعى ساند ع الأمل
أربع خيوط بيمدو قلبى بقلبها
لجل ان ما نعزف لحن مش لاقى الكلام
فنغنى إيه العمل
أربع سنين مستنى فيك تيجى
عمال أوسع خرم فى الإبره
علشان يعدى الجمل
ويبوح بسر الضيف لإبراهيم
او بشرى جت زكريا فى المحراب
قلبى الورق مكتوب عليه عينى اللى مش طايقة السراب
ولا راضية تفتح حضنها للضى
قلبى الضرير محتاج يشوف
ازاى قلم يكتبلك انه وحيد
والكلمة ماشية لواحدها من غير حروف
معروف هييجى اليوم وتسيبنى بالمعروف
لكن بحق انى
شيلتك فى جوف ننى
هفضل جدع دايما وهسيبلك المصروف
يا ضل غيمة سبقها حر الشقا
وجروح بتهدى الروح إلى المشنقة
كمل جميلك بقى
واخرج لابوك هيدوق معاك الهنا
انت اللى عايش وانا
حبة بخار متجمعين
وبيسقو حلق سحابة عطشانة
من إمتى كان قلبى الجنين
محتاج لحضَّانة
من امتى كان ينفع
تيجى وتروح علطول
واجب ضيافتك لسة فى إيديا
هديك حياتى و بيتى وروحى وقلبى وعنيا
هقرأ فى ودنك أية الكرسى
وهبل ريقك كل يوم بيها
وهشيل هموم الدنيا عن ضهرك
وهصد بلاويها
هقفل عيون الخلق لو هتصيب
وهسيبها متصابة
همسح مسمى وظيفتى فى بطاقتى
وهقوله يكتب فى الفراغ بابا
متسيبش إيد عشمانة تمسك فيك
ولا حضن حالف تيجى ويدفيك
جمع دموع أربع سنين
وادفنها فى الماضى
وأشهد بإنى صبرت وان الوجع راضى
واشهد كمان أنك برغم الحنان دلوقتى سايب حضن أبوك فاضى
