الخوف …. عامية بقلم نصر سرحان طاحون
الخوف …. عامية بقلم نصر سرحان طاحون
صحيت م الخضة ملهوف
لقيت الخوف
جبال منصوبة قدامي
وأنا ملفوف
في توب ابيض وتوب مطوي
وتوب موصوف
وشفت ألوف
ألوف بتدارى أكفانها
عيون الموت
تخاف لا تقابله في الضلمة جسد منحوت
تخاف من الصوت
ولو مكبوت
وم الهمسة اللي يوم عدت معاها سكوت
سكوت عن حلم كان لازم يكون معروف
يكون مألوف
يكون صرخة
يكون ضحكة
على المأسوف
تدوب وياها أحلامنا وأوهامنا
كسوف وخسوف
ويجي بكره ما يلاقي
لبكره حروف
عشان يكتب على قبري
دا مات م الخضة
مات من الخوف
