الأراجوز …. شعر حمدي موسى
الأراجوز …. شعر حمدي موسى
ناخد أجازة بقي م الشعر وسنينه
ونسيب فتارينه بما فيها من أصناف
نرتاح بقي م الفكر..الذاكرة تعبت
والقلب بده ينام
أصل الكلام بيجر بعده كلام
ومفيش أمل نسكت
وبنهرى وبننكت علي إيه ؟ منيش عارف
خناقات ورا خناقات…..وشلل ومؤتمرات واستهلاكات للروح واستهلاكات للذات
وبنفضى من جوه…..
والنفس بتلف عكس القلب بالقوة….
ف بنتعصر أوجاع
الصمت أصله صراع الفكرة والأحداث
تبقي جدع لو عرفت توفق الأوضاع
تسكت ف وقت الصراع.
وتبقي أجدع لو عرفت تلاقي فيك أحزان
تبعدها عن قلبك
أحسن مكان للأمان…أنك تكون جنبك
ومعاك كلام موزون
وتنام بملء عيون الحلم بالراحة
وتغيب عن الساحة لو فيها كلب جعان
او فيها ديب سعران
لو خلصت الإنسانية وماتت الخلان
واحسن مكان للقصيدة الضل والخلوة
هناك ضرورى هتلقي معانى م الحلوة
اللي تحب حروف
واحسن دوا للروح انك تصاحبها
تاخد وتدى مش تحاربها
روحك تصون سرك …..آمنها على بلاويك
هى اللي هتدلك ومش هتشمت فيك
روحك أمانة عليك احفظها وراعيها
يارب خليها روحى ماليش فيها لو سيبتها هتموت
الدنيا غارة والنفس أمارة
والناس بتوع الزمن ده…الكتير مش ناس
والغالبية فاقدى الاحساس
أما الحياء انقرض وبقي الميزان مايل
وبقينا نتحايل علي بياعين لاخلاق
بس احنا مش حاسين
والشعر والدواوين…بيطرمخوا علينا…
ويسففوا عنينا الضلمة خوف ورا خوف
فاحسن لنا نسكت…. وبلاش كلام معروف
قلناه ميتين مرة…. الحق دايما كلمته مرة
وعشان كده منبوذ
دا الشعر نفسه اتركب..مبقاش بيتنرفز
مبقاش بيستغرب….مبقاش بيضرب بوز
الشعر بقي تافه… وبيجى لما نعوز
الشعر بقي أراجوز ….فاحسن لنا نسكت
وطن القصيدة اختفي…بقي جمهورية موز
