أنا مسافرة … قصيدة عامية بقلم ابتسام عبد الصبور
أنا مسافرة … قصيدة عامية بقلم ابتسام عبد الصبور
خلاص جهزت لي شنطة
ولا شيلة ولا حطَّة
ولا يحسب لي عدادِك
في آخر كل يوم غلطة
وتنطيطة .. وتشنيكة .. وتخبيطة م السقطة واللقطة
بأمر الله إذا سلِّم
ولا هاشكي ولا اتظلِّم
كفاية صبر ومعافرة
واخطِّي كل يوم حفرة
بقولِك إيه ؟ أنا مسافرة
حبيبي يلا صوم بعدي
واعمل في الهوى دَايت
وجرّب طعمها ف بُعدِي
ودوق كل الغرام بايت
هاتتلفت على صورتي
وتتمناها تكشيرتي
تقول : فينك يا أمورتي ؟
وتحلف كل يوم إني
…. وتتكلم كتير عني ……
تقول : دي حبيبتي دي كانت
في أسرار الغرام طفرة
تقول : من بعدها شابت
سنيني ، والغيطان صفرة
بقولِك إيه ؟ أنا مسافرة
يا فانية ، اضربي جرسك
تعبتي .. بكفياكي كفوف
وأوعي تعلني خرسك
ده ياما دقيتي لنا دفوف
وياما عليكي حوطنا
وفكّرنا البيوت بيتنا
وغيَّرنا وبيِّتنا
آمنا ليكي بعد الخوف
أتاريكي سفينة نوح
و شالتنا وحطتنا
وكنا فوق سطوحها ضيوف
نجي ونروح ولا تدرَى
وراجعيين والإيدين فاضيه
ولا سدرة ولا مدرة
وطلعت م الوفا نافرة
وكاشفه وشها .. السافرة.
بقولِك إيه ؟ أنا مسافرة
يا وحشة ، ومش على كيفنا
وفكَّرناكي تفاحة
يا ناكره ملحنا وعيشنا
بنحضن فيكي من خوفنا
وخارجين فوق طراطفنا
بنتسحب …وبالراحة
ومهما فيكي طال عيشنا
وحبينا وعششنا
بنلقى التذكرة … سياحة
عيون الصفو طفيتي
وقدمتي الجفا بوفرة
وشطبتي وفضيتي
بواقي اللمة والسفرة
بقولك إيه ؟ أنا مسافرة
وسايباكي .. بلا رجعة
وحاضنة( الكهف والأعراف)
وعاملة إن أنا جدعة
وقافله العين وكاتمة الصوت
وداخلة تحت كف الموت
يغطيني بألف لحاف
ولسعة برد في ضلوعي
بتغزل لي كفن وتابوت
وقلبي فيكي متوزع
سنينُه عجاف
لآخر مرة بيودع
على طرف العيون نظرة
وصوت الرمح بيسمَّع
وقلبي بين عصا وجزرة
ولسه م السفر خواف
يا ست الكل يا قادرة
بقولك إيه ؟ أنا مسافرة
أخدتيني على غفله
وكنتي في الوجع سافله
وبحلف لك أيا شاردة
بإني عشتها طفله
وآخر مطمعي .. وردة
أصبَّح لك بكام بوسه
واخاف عالأرض م الدوسة
كإني وصلت للسدْرَة
وبيكي عشت مهووووسة
وكنت ف حبك العدرا
يا دايسة الكل ..يا كافرة
بقولك أيه ؟ أنا مسافرة
