يا عزيزة ….عامية بقلم الشاعر على يحيى
يا عزيزة ….عامية بقلم الشاعر على يحيى
يا عزيزة وعزك مش لاقي
لفيت ما لقيت ولا شئ باقي
وماليتها بحبك أوراقي
وقريت فنجاني لمحت حيتان
يا عزيزة عزك ليه ضايع
ومش لاقي حقي ولو بايع
وزرعت ف أرضك خير يانع
وجنيت الخير ذل وحرمان
يا عزيزة وعزك طالع فوق
وف أرضك زارع حب وشوق
مش لاقي نجاة ولا بلمح طوق
وخايف أفوق على صوت بركان
يا عزيزة وعزك للجاني
وف حبك يا ما قلت أغاني
لِسَّاني بَدَوَر وباعاني
ولِساكي دموع وجراح وهوان
يا عزيزة وعزك مسموح لي
خيرك بيفيض ويصرح لي
وبلم الناس وبجيب أهلي
ونمد الأيد تترد بيبان
يا عزيزة وعزك مش باين
صيتك عدى حدود ومداين
وميعرفش مقامك خاين
قهرك باعك للتعبان
يا عزيزة وعزك في الحواديت
مواويل وحكاوي ورز وزيت
دلوقتي مافيش للموت توابيت
والحلم الفالصو كأنه ما كان
يا عزيزة وعزك خلاني
مش لاقي مجدي وكياني
في الغربة باعيش نبت شيطاني
وف وطني بسأل عن عنوان
