صاحبي …شعر عامية بقلم / محمد المساعيدي
صاحبي …شعر عامية بقلم / محمد المساعيدي
صاحبى ..
مفتاح الحزن اللى أخدته
والأوكرة اللى بتشكى الهجران
على باب العمر المتوارب
على ناس عميان
شاهدين ع البرد اللى بينهش
فى ضلوع الخلق
ترباس العمر اللى مصدى
محكوم بالغلق
فازاى بتنادى بحرية
بنفس مقطوع
وازاى هاتنور أسفلتك
والنور ممنوع
وازاى بتراهن على واحد
مقتول بالجوع
والمشهد لسه بيتكرر
عصافير وبتهجر أعشاشها
وجراح بتدور على شاشها
وعيون بتدور ع الباقى من حلم قديم
دخان وضباب وضجيج وصياح
أحلام وبتزحف ع الأسفلت
عشمانة فى ضيقها تلاقى براح
لساها أميرة بتستناك
وبتفتح طول الليل شباك
عشمانة تخبط يوم ع الباب
وتدوب فى دفاك
مش عايزة تصدق إنك رُحت
والرحلة طويلة ومش راجع
عمالة تحوِّش فى دولابها
حكاوى وافراح ومواجع
لسانى بارن يا صاحبى كتير
مع إنى أكيد مش هالقى جواب
لسانى باحاول أوصل لك
وبافتش دايما فى الأسباب
وفتحت الدفتر
ميت مرة
ألقاك متدون بالأحمر
كان حاضر صاحبك من مدة
مع إنه غياب ..
