وإيه يعني … عامية بقلم بقلمي الفلاح الفصيح معوض حلمي -منشأة بطاش تمي الأمديد – دقهلية

وإيه يعني … عامية بقلم بقلمي الفلاح الفصيح معوض حلمي -منشأة بطاش تمي الأمديد – دقهلية

نص من 2010
من وحي الإغتراب

……. ( وإيه يعني ) …….

…………………………….

مشيت السكه بس سكوت
سابت لي الغربه حبة موت
ومش ناسي اللي كان منها
مابين طيب ، وبين هلفوت
وبين طعم المرار فيها
وطعم التوت
بنتعلم أصول الدرس بالنبوت
وطبع الحياه ماشيه لابد تفوت
بنتبدل ، ونتغير
فمش ممكن
بياض الشيب يعود لشباب
ولا الثيب حتبقى بنت بنوت

فإيه يعني
لو شافوا الجرح يوجعني
ماأنا المقصود وأنا المرصود
وانا المعنى ، وإيه يعني

وإيه يعني
لو نزلت دمعتي مني
تشق الخد للنني
وبين الضحكه والآهه
بتجمعني ، وتقسمني
وإيه يعني

ماانا الشاعر
برص حروفي بمشاعري
وكل الخلق تسمعني
وباعجب ناس وبتساعني
وناس تانيه بتمنعني
وإيه يعني

باكون طيب مع الطيب
لاعمر لساني يوم عيب
وعاب عايب
مهما عاب وقال عني
وإيه يعني

باسامح في اللي جرحني
وباعدل في اللي وقعني
واكمل طوبه في البنيان
وباهجر سكة البهتان
عشان سيرتي
بعد غيابي تشفع لي
تنوب عني
وإيه يعني

باسمع كلمه بطاله
واقول طيب ، ماانا الطيب
باداوي العله وباطيب
عقول عاله
وباكتب كلمتي حاله
فتمشي الفكره تتحالى
بين المخاليق وتتعالي
تكون نبراس
وتبني أساس
من الإحساس
وترفعني
وإيه يعني

مراكب صبري ولاده
واعدي الصعب كالعاده
واخطي الموجه ورا موجه
ماليش في التوهه والهوجه
ولا امشي في سكه معوجه
وباكتب حرفي متحني
وإيه يعني

اقرأ باقي العدد (٢٥ )