هو… عامية بقلم الشاعر حمدي موسى
هو… عامية بقلم الشاعر حمدي موسى
هو المناضل اللي فاضل من بواقي الاحتلال
هوه شاعر
….قال باحبك بانفعال
كلمة كت مشتاقة تطلع
حتى لو جت م الخيال
هوه قالها ومش فى وعيه..بس شكر الله سعيه
قالها واتشاهد ومال
هوه عاشق
عنده م الاحساس بواقي
واما قالوا الحب ولىَّ..هوه دوَّر
واللي بيدور يلاقي
فاكتشف وسط الشراقي بذرة للنور والجمال
حطها ف عينيه ورعاها
بالسهر والشوق سقاها
( واما طال الليل معاها صرخته كانت نهار )
هوه زاهد
طلق الدنيا تلاتة
لم يجد فيها الحقيقة فارتدى توب الشحاتة
مد ايده يقول كرامة…إنسانية…. ملتقاش
الرغبة برضو لسه نية
فاعتزل يمكن يلاقي ف الخلا رطبا جنيا
أو يلاقي الضل فى عيون السباطة
مجدلية. ضحكة من شر البلية.. إحتمال
هوه عيل
كان بيحلم بالرجولة
حد قال له العمر صنعة…واللي يدفع
يبقي واد معمول عمولة
واد ميكسرهوش تخللى
واد بيعرف يبكى وبيعرف يصلى
قلبه مايموتش بسهولة
واد بيجى كل مدة….لما بيشد الوجع بيبان فى شدة
واد معاه أحلام وعدة…الحب علمه البطوله
صار بلال
هوه حالة.
حالة خاصة…مختلف ف الفكر والروح
والمشاعر فيها غصة
عنده زى زيادة حصة فى التلاوة
كان بيقرا من باحبك.. ماتيسر
واما جوِّد والجواب طلع العلالي
نزلت الرحمات تلالى…والوجع طلب الحلال
