مولانا العارف …قصيدة في شعر العامية بقلم إبتسام عبد الصبور
مولانا العارف …قصيدة في شعر العامية بقلم إبتسام عبد الصبور
(قصيدة على لسان شاعر مغرور لا أقصد بها شخص بعينه إنما ظاهرة استشرت في الأوساط الأدبية )
أنا مولاكم العارف
بفن الشعر وأصوله
أنا الفاعل
وأنا فعله
ضميره ويا مفعوله
أنا الأبقى
أنا الأشطر
في وادي الشعر أنا عبقر
وأول ما نطق عنتر ببيت
قلمي كتبهوله
أنا المحمول
على طرف الهوى ورمشه
أنا المأمور
بإني امتلك عرشه
وأعرف صدقه أو غشه
وسره ويا مجهوله
بكلمة مني إلهام شعركم يسطع
بكلمة نجمكم يلمع
ولو أغضب في يوم منكم
مفاعلتن مفاعلتن فعولن
كلها تولَع
فطوفوا عند بيت شعري
وحجوا في دواويني
لاخلّي مَيّة الإلهام
بأمري سرّها يقطع
أنا في المبتدا اسمي
وبيا المنتهى تنولوا
لا تفعيله ها تنفعكم
ولا أوزان تطاوعكم
ولا صَوْلة ولاجَوْلة
ولا قوة ولا حَوْلَ
بإيدي إني ألجّمكُم
وبإشارة أقول : قولوا
فمش لازم أفكركم
كبيركم زي أصغركم
ها يكتب في كراريسه
بإني لشعركم حارس
لحرفي حق تقديسُه
أنا الهارس كواليسُه
وأنا الفاتح ترابيسُه
وأنا الباني متاريسُه
فأوعوا مرة تفتكروا
ف شاعر يمتلك فِكِرُه
ولا مرة أشوف شاعر
ببيت ويقول : ده مِبتكرُه
خليل الشعر ذات نفسُه
نقل عني كلام زانُه
وقال : ربُّه بعتهوله
بيني وبينكو
عَروضه وكل أوزانه
أنا اللي زمان واهبهوله.
فتسبيحكم يكون ليّا
وتكريمكم يكون بيّا
وما اسمعشي فى يوم منكم
بإن الناس سواسية
ده أنا الباقي ليوم الدين
وكل الشعرا هايزولوا
مانا الفاعل وانا فعله
ضميره ويا مفعوله
أنا حَرْفُه وانا ظَرْفُه
وانا الباني لمجهوله
أنا مولاكم العارف
بفن الشعر وأصولُه
