(من حقّي) عامية بقلم أحمد فاروق بيضون – مصر

بمناسبة عيد الطفولة

من حقي أشوف ضوء الصباح يبعتلي ضَيّ
من حقي أحس إن الأمل بُكرَه اللي جَيّ
من حقِّي أقطف مالسَّما نجمة بتلمع
تكتبني حلم ف.. برواز كبيييير ملوهش زي
ترسمني سطر فِغنوه وأفراح طفولة فكُلّ حي
ليه كلّ ضحكة ساعات نحسَّها متغمِّسة فآه وخوف
من حقنا نبقى الحقيقة.. جوه الضباب نطوي الحروف
أيوَه.. من حقنا نبق المعلم والطبيب والمهندس
واللي إيده بتكافح وبتدافع عن أمان مهما كانت الظروف
أيوَه.. صحيح.. أنا صغَيَّر بس عقلي كبيير
واقدَر اجعَل مَصر بلدي تفتخر بابنها
اللي فكُل شبر يتباهى بعَلامه وبجدوده والكل يشوف
ابن بلدك يا بهيَّة.. عقلُه يوزن مالإرادة والذكاء ألوف
وانتو ياللي بتسمعوني..
وكل فرد من صحابي فالمدارس يطوف
مهما كانت الظروف…
احنا بذرة وفخضَارها أحلى نغمات الكفوف
جذرنا أعظم حضارة.. احنا نعمل أي حاجة
شيء أكيد.. إننا إنسان مفيش زيُّه كتير…
بس حقه.. الكون يرعاه بضمير..
وبُكره اللي قرَّب أكيد… هَتشوف.

اقرأ باقي العدد ١٢