لو بالإمكان ! عامية بقلم كمال محمود محمد علي – مصر
لو بالإمكان ! عامية بقلم كمال محمود محمد علي – مصر
لو بالإمكان
إننا نتشطر ع الأحزان
ننسى الحاضر
ننسى دموعه
ونعري الخوف اللي سكنا من ألف زمان
ونعيد تشكيل الكون عصافير
أشجار ونخيل مننا إحنا…من ملامحنا
لو إن الحلم يمد لنا حبل ربيعه…
نختصر العمر اللي طحنا تحت ضلوعه
مليون طحنة
لو بالإمكان
إننا نتشطر ع الأحزان
وندوس ع الهم بألف حصان
ترجع يا أمان
في عيون أطفال حضنوا الغربة
جوة المحنة
من ملامحنا
لو بالإمكان
إن الكوابيس
تغرق في هويس بحر النسيان
إن الأحاسيس تغمرنا حنان
إن الإنسان يرجع إنسان
والعدل يسود !!
لو بالإمكان
إن الدم النازف منَّا
يروي الجنة كمان وكمان
بستان زغاريت
واجمل حواديت
واولاد عفاريت ترمح وتطير
وتعدي بحور زي الرهوان
وتصب النور على أغلى نشيد!!!
لو كان بالإيد …إننا نحلم
نحلم بينا
من غير لاحدود
ولا غربان سود
ولا ليل مرصود جِنُّه علينا
لو بالإمكان
العمر يعود
مريلة بجناح
وصباح فتـَّاح
والكون أفراح
والخير عناقيد
لوبالإمكان إننا نحلم…
الضيّ أكيد
هيعود هيعود
كان بالإمكان
تيجي الفرحة
كان بالإمكان.
