للود خيوط ….شعر عبير عبد المنعم
للود خيوط ….شعر عبير عبد المنعم
على نفس القافية ونفس الوزن ..
لقيت الدمع بيتسلطن !!!
فوق خدي ونام
وعمله مقام
وزرع له حروف
من حلقي أنا طالعه عليه وبطوف …
أترجى الليل !!
يتبرجل حزنه وينساني
ويعيد أيام ..
كنا احنا ولاد نشبه حرافيش !
بيموت الحزن لضحكتهم ..
والضحك دا جيش
ويتوب الدمع بلمتهم ،،
يهرب م الشيش
على نفس القافيه في نفس البيت
أنا شفت العيد في عيون باردة ..
أفكار شاردة !! ،،
وقلوب بتدوب !!
وبتحدف طوب أيامنا عليها !!! وبتطاطي !!!!
على نفس الوزن
أنا شفت الدمعة عيارها عبيط
و لاقيت الوقت اللي بيلمع !!! فالصو
و ياريت …..
ما حاولت اكشف ستر المعدن
ولا أغزل للود خيوطه
طب حد يقولي من العارفين
عن توب الود وألوانه ،،
وسنينه الحلوة ودكانه
محتاج للخيط ؟؟؟؟
