بعتينى ليه؟! ….شعر عامية بقلم حسن أبو عرب
بعتينى ليه؟! ….شعر عامية بقلم حسن أبو عرب
بعتينى و بأرخص تمن
وقلتى دا غير مؤتمن
وانا اللى صابر ع البلا
باشرب كيعان نار الغلا
ودعيت لربى فى الصلا
ودعيت فى سرى و ف العلن
عاشق لدقة خطوتك
وبلملم اشواك سكتك
دمعاتى قناديل ضحكتك
والليل بيْنهش فى البدن
دم الرصيف عاص القدم
والكل مخلوق م العدم
ياتوبه غايبه مع الندم
لاحفظوا فرض ولا سنن
بيبيعوا نبتك و الخَضَار
وبيسرقوا فَرْح الديار
دينهم ومذهبهم دينار
اليورو بيسابق الدولار
والكل طايلاه الفتن
أدمنتى ليه كاس النواح
وطعنتى قلبى بدون سلاح
أنزف مرار قبل الجراح
علم على جسمى الزمن
وأقول يواد يمكن تفوق
وتعود لنا تانى الحقوق
وغروبها يتحول شروق
ونعدى فوق جسر المحن
لكن عدانا مصممه
تفضل حياتنا معتمه
دايرين فى وسط الملحمه
مين اللى قال
ان احنا كنا
ف يوم عبيد
أو كنا ليهم يوم خدم
