حُكم حرام …. عامية بقلم الشاعر / محمد البياع
حُكم حرام …. عامية بقلم الشاعر / محمد البياع
بلاش تبعت ورق دبلان
ماتخسرهاش
وقولت بلاش
بلاش انتو متعرفوهاش
دي بتحب الزرار لما
بيدخل عروة التفاصيل
يمليها خبر عني
وبتملّس على المنديل
كأنه جواب وجاي مني
بتصحي الفجر تدعيلي
ويجي الضهر تدعيلي
وبعد العصر تدعيلي
وف المغرب بتدعيلي
وبتصلي العشا وتفضل
تنقي السبحة من عيني
كماالترتيل
ف صلاة العيد
بتتوضى وتخرج بدري تستنى
وتحدف نظرة من عينها
الاقي النظرة سجادة
ياسادة إزاي متعرفشى معاد نومي
وهي مخدتي ورمشي مابينامشي
مدام قافلة رموش العين
وانام ازاي
وروحي شاربة قهوتها
وعيني فارشة ضحكتها على البرواز
بلاش ازاي
بلاش إزاي اكلمها
وهي لساني والبرهان
وهااسمع مين
وهي الست مع آخر خميس ف الشهر
وهي السهرة من غير كاس
وهي الخمرة من غير سكر
ومن غيرها حياتي إزاز
بلاش هي
وبلاش العشق
طب اعمل إيه ف مواعيدي اللي حافظاها
ورسماها ف ضهر الباب
قصايدي نصها عنها
وشعري رافض التصريح
عن الوحي اللي ف النني
عن النغزة اللي ف الخد
اللي جنني
بلاش؟
تعالوا نتفق عبثا
على إني محبتهاش
ولا هي بتهواني
وبياعني وراكنة قصتي ف سوستة
ف ضهر البُك والشنطة
وهأسأل
وانتو والقاضي تجاوبوني
حكمتوا ازاي على الحب انه لعب عيال ؟
وايه الحب ياسادة
عشان نلحق محطة من محطاته؟ حصانه فين ؟
لجامه حبل متضفر؟
وقضبانه لناس غيرنا؟
طب إزاي الهوى اختارنا
نكون سكان ف مندرته ؟
وكلفنا نقول سيرته
وأسامينا ف اول الدفتر
بلاش حاضر
خلاص ماشي
بلاش نبعت جواباتنا مع العصافير
بلاش نحضن ببصاتنا الهوا والطير
بلاها الشمس تتمرجح على الهمسات
بلاها حاجات مينفعشي ان انا أقولها
حقيقي بلاش
واقول إزاي بلاش تلبس هدوم جلدي
عشان الناس وعيب جدا
بلاش تحضني بعنيها
وبلاش تبكي
غيابي دموع
بلاش والفجر بيأذن تصحيني
توضيني برنتها
خلاص فعلا
انا موافق مااروحشي هناك
ولا احدف ورد
م الشباك
لكن آسف
سيبولي الشيش
املي عنيا من شكله
ومن لونه
ونور الأوضة لو نوّر
تتوه رجليا واتسمر
كما التمثال
واناديلها واغنيلها
وارش الورد من نيلها
ولو فتحت وبصتلي؟
ما هاتكلم
كأني ماشوفتش الجنة
اللي غمزيتلي
واقول ازاي
وانا عمري ف عشقها قوّال
ياقاضي حكمك البطال
مهوش نافذ
وسهم الحقد ف عيونكم
مهوش نافذ
فاقرب فذ
وعبي الهلس في البالطو
وبيع الحكم في الكانتو وبلاش قضبان
كفاية حرام
معدش كلام ولا حواديت
انا وهي بنينا البيت
انا وهي سافرنا بعيد
وسيبنا الراحة للمرتاح
وبيعنا الفرح للأفراح
خلاص ارتاح ياحقد الناس
ركبنا القطر من بدري
أنا وهي بلا وظيفة ولا مَهية
هاناكل لقمة ونغمس
من التسبيل
ونشرب ماية من ريقنا
ومن غير كاس
ونملى الزير من المطرة
ونروي الأرض بالنبضات
مصمم تحكم الباطل؟
فهات الحبل للإعدام
أنا وهي وحُكم حرام
وحولنا على المفتي
ونفذ حكمك الظالم
على مرئى من الحكام
خلاص عشنا أنا وهي
وحبل المشنقة اللي مات
خلاص عشنا أنا وهي
وحبل المشنقة اللي مات
