الحواس الخمسة ….شعر عامية بقلم / حمدي موسى
الحواس الخمسة شعر عامية بقلم / حمدي موسى
الحواس الخمسة فيا
أخلصوا للشعر كتبوه من عينيه
عبروا عنى بأمانة جابوا قلبي من جذوره………….
وصفوا بكره قبل مايشرف بنوره
طلَّعوا الحب اللي ساكت عن شعوره
جرسونى وفرَّجوا الكلمات عليا
الحواس الخمسة دابوا
إستجابوا للهزيمة الإنسانية
والهزيمة العاطفية والهزيمة المؤلمة الغير منطقية
إستجابوا لكل شئ جه واستباحنى
سمحوا للشوق حتى نيمنى ودبحنى
لما عدَّى قصادها ويادوبك لمحنى
إنى سرحان والملامح مستوية
قال دا عاشق قلبه لو سيبناه هياخد ع الهوى يستطعمه ويفتح شهية
الحواس الخمسة ناموا
صحيوا…لقوا قلبي ف غرامه
قلبي كان عارف تمامه
إنه حظه ف الهوى دايما شوية
حَبها ومخدش باله. إنها مش مكتوباله
وانها محتاجة تثبت للمعانى الأبجدية
الحواس الخمسة قلُّوا
ثم ضلوا ثم ملوا….ثم لما دموعها هلوا
بانت الرؤية وحلو….بس مش حلو ياحلو
يعنى تراويحك حبيبتي..رفضوا أحلامى يصلوا
ضحكوا من شر البلية
الحواس الخمسة ماتوا
كل حى اختار حياته….
بس لسه فيه محاولة لو نهز القلب لولا
إنه نازل عند رأى الأغلبية
والحواس الخمسة هما الشعب لهم الأولوية
الحواس الخمسة ظُلموا
لما سكنوا جسم شاعر مات وروحه لسه حية
