الأصيلة ….قصيدة عامية للشاعر / محمود السيد

الأصيلة ….قصيدة عامية للشاعر / محمود السيد

عن البنت اللي وقفتها
بتسوى يا عم 100 واحد
معاك عـ الحلوة والمرة
بدون ما تدادي وتناهد
في كتفك واقفة وبتسند
ما قدرت يوم معاك تعند
ولو كانت حياتك حرب ..
في ضهرك جيش وبتجاهد .
تبيع الدنيا علشانك
ولا تبصش لـ جاه ولا مال
دي تنفع زوجة #والمصحف
على التقوى تربي عيال
تآمن ليها ما تخُمك
وتكرم حتى ابوك وامك
وتنفع رغم فِطرتها ..
في بيتك سيدة أعمال .
دي حافظة ان البيوت أسرار
ما بين بينكم وباب مقفول
ولو حتى انكوت بالنار
ما تنطق حرف ولٌا تقول
كريمة البت من يومها
بضحكة تداري فـ همومها
أصيلة بتعرف الواجب ..
وبترد الجميل أعشار .
يا بختك يا اللي من بختك
وحظك هي ونصيبك
دي تبقى نعمة من ربك
بفضله مش بترتيبك
فَـ صفي النية وادعي له
يمن عليك بتدبيره
يحن عليك بإنسانة ..
في وقت الشدة ما تعيبك .
نصيحة مني واسمعها
عليها جز بسنانك
وما تفرطشِ أو تهمل
في واحدة عايشة علشانك
وفـ حضورك تقول شُبيك
وفي غيابك محافظة عليك
في وقت الفرح تفرح ليك
وتحزن وقت أحزانك .
ولو دورت ما تلاقي ..
مافيش منها بنات خلصوا
دي معدنها أكيد ألماظ
بلاش تتغر في الفالصو
في وقت الفرح يبقوا معاك
و وقت الجد صدقني ..
هيبقوا عُمي واتخرسوا .
بنات الناس كتير لكن ..
مافيش غيرها اللي تنفع لك
لسانك لو هيحدف طوب
بكل سرور هتبلع لك
هتمسح دمعتك وتقيد
صوابع إيدها شمع العيد
تحول قلبها لـ ودان ..
ومهما حكيت هتسمع لك .
في حكمة قالوها ياابني زمان
كلام أبداً ماخيبشي
يا تنزل تشتري من السوق
حاجات غالية يا ماتجيبشي
ودور عـ اللي تشبه لك
وسيبك مـ اللي ما بتسواش
ولو كان الرخيص ببلاش
حذاري بلاش تهوبشي .
بلاش تندم وفـ الآخر ..
تقول هي قسم ونصيب
تعيش دور اللي مش فاهم
وإيش دراني علم الغيب !
ما فهمناك كتير ياما
بلاش تدخل في دوامة
وإبقى عـ اللي تبقى عليك
وسيبك م اللي سهل تسيب.

اقرأ باقي العدد ٢٣