ارجع يازمان ….شعر عامية بقلم حسن أبو عرب
ارجع يازمان ….شعر عامية بقلم حسن أبو عرب
ارجع يازمان حن ياماضى
ع الحال دا انا أبدا مش راضي
فى زمانا الناس صبحوا حدَادِى
ارجع روح هاتلى حاجات ياما
روح هاتلى أصيل مش بيطاطى
مش عايز واتسى ولا شاتى
خلينى سليم على نياتى
رجعلى المسروقَه حياتى
من عينى وشيل كل عتامه
من راحة البال هاتلى زكايب
فى الماضى وسيرته
دا انا دايب
من حب الناس اعطينى نايب
رجعنى لنفسى اللوامه
رجعنى لصوت الليل والناي
والراكيه عليها العيش والشاي
وبسيطه الناس معرفش ازاي!!
وسندنا المولى وويانا
راح اعيش الفقر مدام مستور
هدمتى جلابيه تكون كستور
واللمبه عفُوري بدال النور
روح هاتلى الهِمه القَوَّامَه
رجعلى الغيط والجُرن زمان
والخير بيتوزع بالمجان
والدنيا أمان
كان لسه الناس اصحاب وجيران
واللى حداهم يبقى حدانا
رجعلى العيله والطبليه
لو لقمه حلال تبقى هنيه
خد منى حياة المدنيه
وناولنى القله المليانه
رجعنى لزمن الدار تانى
والمقعد وحمام فى بنانى
وفطير ومشلتت فى صواني
ومصاطب جاهزه لمِسَانا
رجعنى لزمَن الملَّايَا
والحب الساكن جوايا
كان لسه مازال صافيه نوايا
كان لسه هناك صدق أمانه
لو حد بيغلط يتحاسب
يتصافى الكل ويتعاتب
لا العيبه بنرضى ولا العايب
ولايمكن يقعد ويانا
ارجع يازمان حن ياماضى
ع الحال دا انا أبدا مش راضى
فى زمانا الناس صبحوا حدادى
ارجع روح هاتلى حاجات ياما
ارجع روح هاتلى
حاجات ياما!!
